Dialogu mes Kosovës dhe Serbisë do të vijojë me ndërmjetësimin e Bashkimit Evropian më 5, 6 dhe 7 shtator. Lajmi është konfirmuar nga zëdhënësi i BE-së për Çështje të Jashtme dhe të Sigurisë, Peter Stano.
Të hënën do të zhvillohet takimi në nivel të lartë, ndërsa gjatë fundjavës në nivel të ekspertëve.
Peter Stano ka thënë se të hënën, Përfaqësuesi i lartë i BE-së për Politikë të Jashtme dhe Siguri, Josep Borrell dhe Përfaqësuesi i Posaçëm për dialog, Mirosllav Lajçak, do të presin kryeministrin e Kosovës, Avdullah Hoti dhe presidentin e Serbisë, Aleksandar Vuçiç në Bruksel.
“Ky është një dialog që do të rezultojë me një normalizim të raporteve mes palëve dhe që do të përmbyllej me një marrëveshje ligjërisht obliguese”, ka thënë ky zëdhënës i BE-së, duke shtuar se interpretimet dhe qëndrimet shpesh të ndryshme të palëve janë pjesë përbërëse e këtij procesi.
“Ne jemi lehtësues e jo komentues të dialogut”, ka thënë ai në një konferencë për media.
