Taksat mbi pagën në Shqipëri janë dy herë më të rënda, se sa në vendet e tjera të rajonit.
Sipas Bankës Botërore, në raportin e fundit ekonomik për Ballkanin, norma progresive prej 23%, është unike në të gjithë rajonin, ndërsa në vendin tonë është dukshëm më e lartë se sa ajo që aplikojnë vendet e tjera fqinje.
Ndërkohë, përveç Shqipërisë, shtetet të cilat i taksojnë pagat me tatim progresiv në rajon janë Maqedonia e Veriut dhe Kosova, ndërsa në shtetet si Serbi, Bosnjë dhe në Malin e Zi pagat taksohen me taksën e sheshtë 10 për qind.
Shkalla më e lartë e taksës progresive nuk është faktori i vetëm që rëndon barrën e punonjësve në Shqipëri. Sipas të dhënave nga Banka Botërore, paralelisht Shqipëria është dhe vendi që ka kufirin më të ulët në zbatimin e kësaj shkalle.
Deri në vitin 2013, Shqipëria pati taksë të sheshtë mbi të ardhurat në nivelin 10 për qind. Por me ardhjen e qeverisë së majtë në pushtet, sistemi i taksimit të pagave ndryshoi në progresiv duke rritur ndjeshëm barrën e taksave.
