Pas deklaratës nga Partia Demokratike e cila akuzoi kryebashkiakun Erion Veliaj dhe kryeministrin Edi Rama se kanë përgatitur fillimin e një krimi tjetër mjedisor dhe grabitje të pronës publike për planin e tyre të pasurimit dhe pastrimit të parave nëpërmjet kullave tek Liqeni Artificial i Tiranës, ka reaguar dhe Bashkia e Tiranës.
Bashkia i quan të pavërteta akuzat e Partisë Demokratike dhe thekson se ndryshe nga sa ishte parashikuar nga bashkia e mëparshme, me planin e ri, në zonën e Liqenit nuk lejohen më ndërtime dhe rendit zonat që i kthehen parkut të liqenit.
Edhe zona e Gardës së Republikës, me planin e ri i kthehet Parkut të Liqenit. Ndërkohë Bashkia thotë se Basha i dha leje vetes për shtesë kati por tani janë pezulluar.
DEKLARATA E BASHKISË
Partia Demokratike doli përsëri blof sot kur akuzoi Bashkinë e Tiranës për përcaktimin e një zone të re zhvillimore me Planin e ri të qytetit. Me sa duket, Partisë Demokratike i është dashur 1 vit e gjysëm nga miratimi i planit urbanistik për të zbuluar se, me planin e ri, në zonën e Liqenit nuk lejohen më ndërtime.
Në rastin konkret, bëhet fjalë për zonën e Gardës së Republikës, zonë (TR169) e cila me planin e ri i kthehet Parkut të Liqenit – kjo ndryshe nga plani i Bashës (zona 5-27), i cili e kishte tërësisht të zhvillueshme.
Kjo është vetëm 1 nga 5 zonat e ndryshme të Tiranës që Bashkia e Tiranës, me planin e ri, ia ka kthyer Parkut të Liqenit, duke pezulluar tërësisht zhvillimin, ndryshe nga ndërtimet pa kritere që parashikoheshin me planin Basha.
Këto zona janë:
1. Zona e pishinave dhe e Parkut Olimpik
2. Parkimi privat te fillimi i Digës së Liqenit
3. E gjithë hapësira e pazhvilluar e zonës së Gardës
4. Zona e ish-disko Refleksionit
5. Zona e kompleksit të Universitetit Politeknik të Tiranës
Gjithashtu, në dy zona të tjera, tashmë të zhvilluara, pranë liqenit janë pezulluar shtesat në volum. Një prej këtyre zonave, në fakt, është edhe banesa private e kryetarit të PD-së, i cili gjatë kohës që ishte kryetar bashkie i dha vetes leje ndërtimi për shtesë kati mbi një pallat 11 katësh, në shkelje të pastër të ligjit dhe në konflikt interesi flagrant.
Parku i Liqenit të Tiranës është kthyer sot në një nga zonat më të frekuentuara të qytetit, sidomos nga fëmijët, pikërisht nga investimet e kryera në këto 3 vjet dhe prishja e ndërtimeve pa leje që kishin mbirë aty në vitet 2011-2015.
Bashkia e Tiranës siguron qytetarët e saj se koha kur hiqeshin terrene shkollash për të bërë pallate (si rasti i shkollës “Kosova”) ka mbaruar në qershor 2015.
