Pas abuzimeve të shumta të denoncuara edhe nga përdoruesit e linjës, Bashkia e Tiranës i ka hequr licencën kompanisë që menaxhon linjën e Unazës në kryeqytet. Lajmin në fjalë e ka bërë të ditur vetë kryetari i Bashkisë, Erion Veliaj, gjatë një takimi me administratorët e shkollave. Po kështu ai paralajmëroi edhe linjat e tjera, se po vëzhgohen në raste papërgjegjshmërie.
“Kam qenë shumë i angazhuar gjatë kësaj vere, për të bërë disa ndërhyrje në transportin publik. Një prej tyre ka të bëjë me linjat e funksionimit të autobusëve në Tiranë. Kam vendosur që këtë javë t’i heq licencën kompanisë që menaxhon linjën e Unazës, për një sjellje absolutisht të papërgjegjshme, për abuzim gjatë gjithë kohës së Covid-it me justifikimet për të kryer shërbimin. Ky është edhe një paralajmërim për linjat e tjera. Po i vëzhgojmë me shumë imtësi”, deklaroi kryebashkiaku Veliaj.
Kreu i Bashkisë Tiranë tha se linja do të rivihet menjëherë në dispozicion të qytetarëve, por tashmë me një operator tjetër. Veliaj premtoi se çdo gjë do i rikthehet normalitetit, para vitit shkollor.
“Për të qetësuar të gjithë qytetarët që përdorin atë linjë, tranzicioni për t’u kthyer në normalitet do të ndodhë përpara vitit shkollor”, deklaroi Veliaj.
