Këshilli Bashkiak i Kukësit ka miratuar sot faljen e taksave vendore, për 5 muaj për hapësirën publike.
Në mbledhjen e radhës online, Këshilli ka vendosur edhe për shtyrjen e disa taksave për biznesin e vogël deri më 20 qershor të këtij viti.
Taksa vendore për hapësirat publike do të paguhet vetëm për 7 muaj në territorin e Kukësit. Sipas Drejtorit të Kabinetit të kryetarit të bashkisë Kukës, Granit Gjana kjo do të sjellë lehtësimin e biznesit të vogël në këtë situatë emergjente shëndetësore e sociale.
“Bashkia e Kukësit ka qenë në një situatë shumë të vështirë këto kohë dhe ka bërë maksimumin e mundshëm me të gjithë burimet, resurset, donatorët, për të kaluar këtë situatë. Janë ndihmuar mbi 3000 familje.
Gjithashtu në kuadër të masave në situatën ku ne ndodhemi bashkia e Kukësit ka marrë edhe dy projektvendime përsa i përket taksave dhe tarifave vendore. Një projektvendim lidhet me shtyrjen e vendimeve vendore, që janë taksat për biznesin e vogël deri me datën 20 qershor. Deri në këtë datë nuk do të ketë penalitete për shlyerjen e tyre. Një projektvendim tjetër lidhet me afatin e përllogaritjes së tarifës për hapësirën publike. Hapësira publike nuk do paguhet për 12 muaj por vetëm për 7 muaj”, tha Gjana.
