Bashkëshorti i Vjosa Osmanit është kërcënuar rëndë në vendin e punës, dhe ka përfunduar në polici. Prindon Sadriu, pas formimit të qeverisë së Albin Kurtit dhe shkarkimit të ambasadorëve politikë me dekret të presidentes Vjosa Osmani, është duke udhëhequr Ambasadën e Kosovës në Maqedoninë e Veriut. Ai është kërcënuar në vendin e punës nga një koleg, raporton “Indeksonline”.
Çfarë ka ndodhur?
Gjatë së martës, burri i Presidentes Osmani teksa ka qenë duke punuar në Ambasadën e Kosovës në Maqedoninë e Veriut, në zyrë i është futur një ish-koleg. Ky i fundit, me dekret të presidentes Osmani është liruar nga detyra. Ai ka kërkuar sqarime nga burri i presidentes Osmani rreth arsyes së shkarkimit të tij. Gjatë bisedës i dyshuari kishte kanosur ankuesin (Prindon Sadriun) duke i thënë se nuk intereson nëse dy familjet do të jenë në konflikt ose në gjak mes tyre, dhe se dikush për këtë çështje do të mbajë përgjegjësi.
Pas kësaj bisede, në orët e pasditës së datës 9 qershor, Prindon Sadriu e raporton rastin në policinë e Kosovës. Vepra është duke u cilësuar si “Kanosje”.
Karriera/ Prindon Sadriu, diplomat
Prindon Sadriu është diplomat i karrierës në Ministrinë e Punëve të Jashtme. Në korrik të vitit 2019 është emëruar në postin e zëvendës-shefit të misionit të Kosovës në Maqedoni, ku mban gradën e ministrit në shërbimin diplomatik të Kosovës. Muajin e kaluar, me anë të dekreteve, Vjosa Osmani ka shkarkuar 12 ambasadorë të Kosovës nëpër botë, me arsyetimin se janë të emëruar politikisht.
