Pas takimit me aleatët, Lulzim Basha iu kërkoi shqiptarëve që të bashkohen për të rrëzuar qeverinë e krimit siç e cilësoi ai.
Sipas tij, Shqipëria nuk mund të bëhet pjesë e BE-së me një ministër të Brendshëm si Fatmir Xhafaj dhe një kryeministër si Edi Rama. Të dy këta duhet të largohen sa më parë sipas Bashës.
Samiti i Sofjes sipas Bashës, e kanë bërë të qartë se nuk ka negociata me një qeveri të inkriminuar.
Për këtë arsye, ai ftoi në 26 maj qytetarët për të protestuar kundër qeverisë së Ramës.
Lulzim Basha: Ftoj qytetarët që të protestojmë së bashku për largimin e Fatmir Xhafajt. I ftojmë të protestojmë për largimin nga policia të atyre që ndihmojnë kriminelët si Agron Xhafaj, Habilajt, Balilajt. Ne do t’i themi ndal procesit të zëvendësimit të kriminelëve që i shërbenin Tahirit me ata që i shërbejnë Xhafajt. Sot duhet të kemi një Ministri të Brendshme dhe një polici që i shërben njerëzve. Jo një polici që rrëmben në mes të natës Zaganin dhe kuksianët e pafajshëm, ndërkohë që i nënshtrohet Artan e Moisi Habilajt dhe Agron Xhafajt. Ne duam një polici ku Vettingu të fillojë nga Ministri i Brendshëm tek polici më i thjeshtë.
Ka nuk ka asnjë lidhje me krimin dhe me kriminelë as polici i thjeshtë dhe as Ministri i Brendshëm. Ne i ftojmë qytetarët për të protestuar për drejtësi të vërtetë dhe jo false. Për drejtësi të barabartë për të gjithë. Për drejtësi që nuk kursen asnjë politikan.
Ndaj ne i ftojmë të gjithë qytetarët të protestojnë për t’i thënë ndal krimit dhe drogës.
Ne mund ta bëjmë këtë gjë. Ne e kemi bërë këtë gjë.
Edi Rama e mbrojti, por ne e larguam Armando Prengën
Edi Rama e mbrojti por ne e larguam Arben Ndokajn
Edi Rama e mbrojti por ne larguam Mark Frrokun
Edi Rama e mbrojti por ne larguam Elvis Roshin
Edi Rama e mbrojti por ne larguam Saimir Tahirin
Sot Edi Rama po mbron Fatmir Xhafajn, por ne do ta largojmë.
Qëndrimi i Fatmir Xhafajt si Ministër i Brendshëm është kosto për Shqipërinë, është goditje për drejtësinë.
Shqipëria ka njerëz të ndershëm që mund t’i shërbejnë popullit.
Edhe Partia Socialiste ka njerëz të ndershëm që mund t’i shërbejne më mirë se Fatmir Xhafaj.
Ndaj ftoj në protestë ftojmë edhe socialistët e ndershëm Partinë e të cilëve Edi Rama ja u rrëmbeu dhe ja u ka lënë peng të krimit dhe të drogës.
Prej katër vjetësh Edi Rama u dha pushtet kriminelëve dhe luftoi popullin.
Por ne kemi treguar në këto katër vjet se ne jemi më të fortë se krimi, jemi më të fortë se Edi Rama.
Pushteti u takon njerëzve dhe jo ministrave.
Pushteti është i popullit dhe jo i kryeministrit.
