Teksa prezantoi programin e PD për bujqësinë me fermerë të Kosmaçit në Shkodër, Basha tha se me zgjedhjet e ardhshme vendore mund të kemi edhe zgjedhje te parakohshme parlamentare. Por kjo sipas tij, mbetet në dorë të qytetarëve. Në vazhdën e akuzave, kryedemokrati tha se pushteti është blerë me lekë, dhe se e përdorin për të vjedhur më shumë.
“Një test i madh po afron. Vitin e ardhshëm do të kemi zgjedhjet vendore, të cilat mund të jenë fare mirë në të njëjtën kohë edhe me zgjedhjet e përgjithshme të parakohshme. Do të jenë një shans i jashtëzakonshëm, që ju të ushtroni të drejtën që keni për të vendosur se çfarë qeverisje doni.
Unë jam këtu për t’ju komunikuar bindjen time, se gjithë problemet mund të zgjidhen nëse ushtroni me mençuri zgjedhjen e drejtuesve të duhur si në nivel lokal edhe qendror”, deklaroi Basha ndër të tjera.
“Jemi futur në një rreth vicioz. E blejnë pushtetin me lekë dhe e përdorin për të vjedhur më shumë. Në këtë rreth vicioz, janë një grup pushtetarësh që përfitojnë, por humb i gjithë populli”.
