Kreu i Partisë Demokratike, Lulzim Basha ka zgjedhur kupolën e tij drejtuese me të cilën do të zhvillojë betejën e tij parlamentare dhe për rrjedhojë funksionimin e partisë.
Kupola drejtuese do të bëhet publike në muajin shtator. Ndërsa mësohet se Basha ashtu siç veproi edhe me listat e kandidatëve për deputetë, i ka fiksuar shumicën e emrave dhe funksionet që do të mbajnë.
Basha po përgatitet për të zhvilluar opozitën e tij, kur sesioni i ri parlamentar është në prag. Ndërsa analiza mbi dështimin e kësaj force politike është lënë për një periudhë të mëvonshme.
Për të shërbyer më pas dhe si një element mbi të cilin do mbështetet zgjedhja e krerëve të PD në të gjitha degët e saj në rrethe.
Duke qenë se Kuvendi do të mblidhet në fillim të shtatorit dhe për pasojë, që në fillim zgjidhet kryesia e Kuvendit, komisionet parlamentare dhe përbërja e tyre, PD duhet të jetë e përgatitur për emrat që do të jenë në krye të grupit por dhe gatshme për të marrë vendin që i takon si nënkryetar Kuvendi, kryetar e nënkryetarë komisionesh parlamentare.
Prandaj Basha i ka marrë punët me shpejtësi duke e bërë gati listën e lidershipit të Kuvendit. Sipas do të ketë ndryshime drastike në kupolën drejtuese të PD në Kuvend, dhe për pasojë dhe në PD.
Drejtuesi i grupit të PD dhe emri që do të jetë nënkryetar Kuvendi, automatikisht janë dhe nënkryetarë të PD. Është një proces i fiksuar dhe në statusin e kësaj partie që kryetari i grupit dhe nënkryetari i Kuvendit, janë dhe nënkryetarë të PD.
Kështu ka qenë kur ishte Topalli, kur ishin dhe Patozi dhe Spaho.
Deputetja e Qarkut të Dibrës Dhurata Çupi pritet të jetë e propozuara e Bashës për nënkryetare Kuvendi, dhe për pasojë do të jetë dhe nënkryetare e PD, shkruan TemA.
Ndërkohë që kryetar i grupit parlamentar të PD pritet të jetë deputeti Enkeled Alibeaj, që bën një rikthim të fuqishëm në lidershipin e PD. Këta janë figurat mbi të cilat Basha pritet të mbështetet fort, tashmë që dhe Ristani është jashtë Kuvendit dhe për pasojë besohet se nuk do jetë as sekretar i Përgjithshëm në zgjedhjet më të para në Këshillin Kombëtar.
Ndërkohë që bëhet e ditur se kandidaturat për nënkryetar të grupit parlamentar do të dalin gara mes Edmond Spahos, Eduard Halimit dhe Gent Strazimirit. Sekretar i grupit parlamentar pritet të jetë Edi Paloka, aktualisht kryetar i grupit të deputetëve të PD.
Ngjitet dhe Grida Duma, e cila paralel me hyrjen për herë të parë në Kuvend, pritet të zgjidhet sekretare e grupit të PD. Ndërsa në komisionet parlamentare, situata është më e thjeshtë. Në dy komisione parlamentare, Komisionin e Ligjeve dhe Komisionin e Sigurisë, pritet të jenë përkatësisht Oerd Bylykbashi e Flamur Noka, të cilët kanë qenë dhe në legjislaturën e kaluar.
Komisioni i Jashtëm mësohet se do të ketë sërish si nënkryetar deputetin Aldo Bumçi. Kryetar i Komisionit të Integrimit mësohet se pritet të jetë Jorida Tabaku, ndërsa tek Ekonomia nënkryetar komisioni Edmond Spaho.
Ndërsa nënkryetar i Komisionit të Veprimtarisë Prodhuese, pritet të caktohet deputeti i ri i qarkut të Vlorës Agron Shehaj. Pavarësisht se Albana Vokshi dhe Genc Pollo janë rizgjedhur si deputetë, me shumë mundësi tek komisioni i Shëndetësisë në vend të Vokshit pritet të jetë Tritan Shehu ose Bardh Spahia kryetar, ndërsa tek komisionit i Arsimi e Medias, Pollon pritet ta zëvendësojë Luçiano Boçi.
Në këtë mënyrë, me këto emërime Basha mendon të mbulojë vendet vakante të lënë nga përjashtimi i Patozit, Bregut, Topallit, Bodes, Rulit dhe figurave të tjera të PD dhe krijimin e një lidershipi të ri në Kuvend dhe në PD.
Drejtuesit e rinj të mundshëm të PD në Kuvend dhe parti:
Nënkryetare e Parlamentit Dhurata Çupi, automatikisht nënkryetyare e PD
Kryetar Grupi Enkeled Alibeaj, automatikisht nënkryetar i PD
Nënkryetar grupi mes Edmond Spahos, Eduard Halimit, Gent Strazimirit
Sekretar i grupi parlamentar Edi Paloka
Zëdhënëse e grupit parlamentar Grida Duma
Kryetar i Komisionit të Integrimit Jorida Tabaku
Kryetar i Komisionit të Arsimit e Medias Luçiano Boçi
Kryetar i Komisionit të Shëndetësisë mes Tritan Shehut, Bardh Spahisë
Nënkryetar i Komisionit të Jashtëm Aldo Bumçi
Nënkryetar i Komisionit të Sigurisë Flamur Noka
Nënkryetar i Komisionit të Ligjeve Oerd Bylykbashi
Nënkryetar i Komisionit Veprimtaria Prodhuese Agron Shehaj
Nënkryetar i Komisionit të Ekonomisë Edmond Spaho
