Të pakënaqur me koalicionin me PD-në, 10 parti të vogla opozitare në vend do të krijojnë një bosht të ri politik.
Lajmin e bën të ditur kreu i Partisë Agrare Ambientaliste, Agron Duka i cili shton se platforma kryesore e këtij boshti do të jetë reforma zgjedhore.
Në një intervistë për “Koha Jonë”, Duka thotë se nëse PD dhe Lulzim Basha nuk do të reflektojnë për reformën zgjedhore, PAA dhe grupimi i ri politik do të shqyrtojë pozicionet e tyre. Disa ditë më parë, Duka ishte ideatori i një takimi me pesë kryetarë të partive opozitare, kreun e FRD, Bamir Topi, kreun LIBRA Ben Blushi, kreun e LZHK Dashamir Shehi, kreun e PDK Nard Ndoka dhe kreun e PBDNJ, Vangjel Dule.
Duka, këtë javë publikuat disa foto të një takimi që zhvilluat në Durrës me z. Topi, z. Blushi, z. Shehi, z. Ndoka dhe z. Dule. Ato fotografi bën xhiron e mediave online në Shqipëri, të cilat po aludojnë për krijimin e një poli të tretë politik. Mund të na jepni një koment?
Në mbyllje të këtij viti, i cili ka qenë mjaft i ngarkuar për politikën shqiptare; dhe si pasojë e dinamikave që morën ngjarjet, dhe efektet që ato patën mbi partitë alternative, vendosëm të hedhim disa hapa të cilat do të konkretizohen duke nisur nga janari i ardhshëm. Mund të them se rezultati i parë do të jetë krijimi i një boshti prej 10 partish, parlamentare dhe jo, dhe bashkërisht do të prezantojmë një platformë me propozime konkrete; sigurisht, guri i themelit i këtij bashkimi është “Reforma Zgjedhore”. Lançimi i kësaj ideje politike, e kësaj alternative, do t’i bëjë mirë shoqërisë shqiptare dhe vetë jetës politike në vend, pasi kërkon që procesi zgjedhor të lejojë përfaqësimin e sa më shumë shtresave të popullsisë. Ideja e një poli të tretë apo të qendrës, në thelbin e saj ka edhe një efekt tjetër pozitiv, limiton mazhorancat e plota nga një forcë e vetme; eksperiencat kanë treguar që mazhoranca, sidomos aktualja, sillen me arrogancë dhe për të frenuar këtë sjellje është e rëndësishme të ketë një ekuilibër në çdo mazhorancë të ardhshme.
