Kreu i Partisë Demokratike, Lulzim Basha në një bashkëbisedim me studentët e Universitetit të Politeknikut, ku i premtoi studentëve se me ardhjen e PD në pushtet do të mundësojë praktikë në bazë të konkurrencës së ndershme për 10 mijë studentë në vit.
Basha u foli studentëve për takimet e zhvilluara me studentë që kryenin stazhin në Bundestagun, ku 8 prej të cilëve ishin shqiptarë, ndërsa premtoi stazhin për 10 mijë studentë në vit, të financuar nga qeveria.
“Pra 10 mijë studentë shqiptarë në vit, do të përfitojnë mundësinë përmes konkurrencës, të jenë diku në praktikë pune në sektorin privat apo në institucione shtetërore. Mënyra se si do të realizohet, do të reflektojë prioritetet e zhvillimit të Shqipërisë, sepse kur bën stazhin e bën me synimin që të mësohesh me praktikën e punës dhe të gjesh një vend pune. Fjala kyç këtu është një vend pune. Edhe n.q.s qeveria financon 100 mijë stazhe, nëse s’ka vende pune çfarë do të bësh?! Prandaj gjithçka duhet të jetë në funksion të krijimit të vendeve të qëndrueshme të punës me kushte dhe paga dinjitoze.
Në programin e ri të PD do të sigurohet fondi për stazh për 10 mijë studentë në vit, të financuar me 30 mijë lekë në muaj, që bëjnë urën për kalim nga universiteti në tregun e punës. Kjo do të sigurohet nga bashkëpunimi universitet- biznes- qeveri. Stazhi nuk është zgjidhja, por një pjesë e rëndësishme e saj”, shprehet Basha.
