Kreu i Partisë Demokratike, Lulzim Basha ka folur për modernizim të së djathtës, teksa tha se PD do zgjedhë kandidatët për deputetë me sistemin një anëtar një votë.
Duke iu referuar këtij ndryshimi, Basha tha se kjo i shërben llogaridhënies dhe transparencës, duke bërë një transformim të thellë të skenës shqiptare.
Duke folur për platformën e aleatëve, Basha tha se nuk ka asnjë ngërç mes tyre, teksa kërkesa që kanë është e qartë: mbetet largimi i Ramës dhe krijimi i qeverisë tranzitore.
Fjala e Bashës:
Unë jam këtu për t’ju thënë se po avancojmë në rrugën tonë për demokratizimin dhe modernizimin mes PD-së. Takimi që sapo ka përfunduar është me drejtorin Institutit Republikan Amerikan për Europën de ekspertët nga Uashingtoni, qëllimi është i njëjti: PD pavarësisht sistemit zgjedhor do zgjedhë të gjithë kandidatët e vet për zgjedhjet e ardhshme, kandidatë për deputetë duke përfshirë të gjithë anëtarësinë me sistemin një anëtar, një votë. Ky është një hap i jashtëzakonshëm, model perëndimor që e çon pushtetin dhe vendimmarrjen drejtpërdrejt të anëtarësia e partisë. Kjo i shërben në radhë të parë transparencës, llogaridhënies që fillojmë këtë model brenda partisë. Kandidatët për deputetë do i nënshtrohen një procesi vlerësimi. Do bëjmë një transformim të thellë të skenës politike shqiptare.
Ne jemi sot në një betejë për jetë a vdekje për demokracinë, por kjo nuk e pengon PD-në të përgatitet për përgjegjësitë që ka para qytetarëve shqiptarë.
Duke zgjedhur deputetet me përfshirjes e plotë të anëtarësisë, japim garanci që qeverisja do të jetë e qytetarëve dhe jo të oligarkisë, të cilat janë sot ortakë me këtë qeveri.
Kushti i padiskutueshëm mbetet largimi i Ramës dhe krijimi i qeverisë tranzitore për të cilën do japim detaje në ditët në vijim.
