Kryetari i Partisë Demokratike, Lulzim Basha deklaroi se vetëm me ndihmën e ndërkombëtarëve, ëndrra për “Shqipërinë si Europa”, mund të bëhet realitet.
Sipas tij, Shqipëria gjendet në një udhëkryq të pamerituar për shkak të keqqeverisjes, ndërsa nuk hezitoi t’iu bëjë thirrje “miqve” gjermanë që të bëjnë çka është e mundur që Shqipëria të hapë rrugën e integrimit.
“Ndaj, unë jam plot besim se bashkë me shqiptarët dhe me ndihmën e miqve tanë, do t’ia dalim ta bëjmë Shqipërinë si Europa.
Me ndihmen e madhe të Fondacionit “Konrad Adenauer” dhe te mikut tim Walter Glos, ne kemi sot programin ekonomik që do ta nxjerrë vendin nga kriza dhe do t’i japë zhvillim ekonomik, kemi të rinj dhe të reja të mirë-trajnuar dhe që jane gati të marrin përsipër sfidat e qeverisjes, po modernizojmë partinë tonë e po vendosim piketat e qeverisjes së nesërme, një qeveri të njerëzve, nga njerëzit dhe që punon për njerëzit.
Jam i bindur se me ndihmen e Tobias Ruttershof, Florian Feirabend, Fondacionit “Konrad Adenauer” dhe mbështetjen e CDU-së do t’u japim shqiptarëve zhvillimin që meritojnë, të ardhmen që presin.
Faleminderit dhe mirënjohje për kontributin tuaj!
Ndihuni krenarë për çfarë keni bërë për Shqipërinë dhe shqiptarët. Ne jemi krenarë që jemi partnerët tuaj me misionin për ta bërë Shqipërinë si Europa”, deklaroi kryedemokrati.
Sakaq, në përshëndetjen e tij në ceremoninë e 10-vjetorit në Shqipëri, e cilësoi Fondacionin Korad Adenauer si avokatin më të madh të integrimit të vendit tonë dhe të hapjes së negociatave për në BE.
