Kreu i Partisë Demokratike, Lulzim Basha në deklaratën e tij të parë për mediet pas përfundimit të procesit të votimit tha se tani fillon procesi më i vështirë për demokracinë në vend.
Basha falenderoi shqiptarët që refuzuan të bëhen pjesë e deformimit të vullnetit si dhe bëri thirrje për një proces numërimi pa probleme.
“Falenderoj gjithë shqiptarët. Falenderoj në mënyrë të veçantë të gjithë ata që refuzuan përpjekjen për të deformuar votën e qytetarëve dhe nuk u bënë pjesë.
Tani fillon procesi më i vështirë për demokracinë në vend. Të gjithë atyre që morën pjesë në votim u garantoj se do të shihet vullneti i popullit. Qytetarët kanë bërë sakrificë të madhe që votuan në një ditë feste dhe në temperature shumë të lartë.
Ndaj u kërkoj komisionerëve tanë që të jenë të kujdesshëm në çdo votë. Dhe sipas asaj që më kanë raportuar strukturat e Partisë Demokratike, unë jam shumë optimist për rezultatin tonë“, u shpreh Basha.
