Kreu i PD-së ndodhet në Krujë, ku po zhvillon një takim me banorët të zonës.
Gjatë fjalës së tij, Basha premtoi rritjen e pensioneve dhe uljen e taksave, si përmirësim të ekonomisë së vendit.
Basha akuzoi Ramën se ka frikë, prandaj edhe e refuzon debatin publik, ndërsa sulmoi edhe LSI-në, për të cilën tha se do marrë fund më 25 qershor, prandaj sugjeroi Metën ta marrë “me qetësi e dashuri”.
FJALA E BASHËS:
Fijet e pushtetit nuk do të tërhiqen nga një grusht politikanësh, ju kurrë nuk do të jeni më kukulla në duart e politikanëve. Ju do keni ë dorë politikanët dhe jo ata ju. Pushteti do të jetë në duart tuaja.
Është e domosdoshme që ta bëjmë këtë ndryshim të madh sepse vetëm kështu do rikthejmë rritjen e rrogave. Zotimi im para jush, premtimi im i parë është se nuk do të jem kryeministri i fjalëve, por do jem kryeministri i ekonomisë, i punësimit dhe i punës.
Kjo vjen duke i dhënë fund taksave të larta, ekonomia e fortë do të bazohet në taksat e ulëta. Më shumë vende pune me rroga të mira do të thotë çlirim i energjive pozitive. Programi im ekonomik parashikon stazhe të paguara me 200 mijë lekë të vjetra në muaj për çdo student. 100 milion euro për bujqësinë që fermerët të dalin nga mjerimi. Mbështetja për të gjithë kompanitë që krijojnë vend pune. Edi Rama thotë se ka bërë shumë dhe i referohet fasadave e palmave. 400 mln euro ka harxhuar për rilinden urbane.
Populli do bukë, ky thotë ja ku janë palmat, populli do ujë, ky thotë ja ku janë shatërvanët.
Ka një javë që refuzon debatin, sigurisht ka frikë edhe nga unë, nga ekipi dhe programi im. Për t’i ikur debatit këput lloj-lloj mufkash nga mëngjesi deri në darkë. I kam thënë cdo ditë ku i ke 300 mijë vende pune? Nuk përgjigjet. Njerëzit nuk janë dele Edi Rama dhe njerëzit ta kanë pirë lëngun, s’i gënjen dot me palma, duan punë, duan pensione, duan shëndetësi, duan arsim! Mund ta refuzosh debatin me mua, por nuk i ikën dot pyetjes së shqiptareve. Vazhdojë estradën me citjane, me tuta, me barcaleta, asnjëra prej tyre nuk të funksionon. Erdhi koha të ndëshkohesh me votë e të marrësh atë që meriton.
Kemi edhe shokun Ilir. Opozita është e bashkuar falë jush në një sigël PD, kurrë nuk ka ndodhur në 27 vjet e gjithë e djathta në një sigël. Këta janë të përçarë, kush i përçau? Pazari, tepsia. Kanë një javë garë me njëri-tjetrin me program të vetëm kolltuku dhe timonin. Pazari i fundit i Republikës së Vjetër ishte zgjedhja e Presidentit. As nuk u pyet njeri, as nuk vendosi njeri, dy njerëz me peshk e me verë zgjodhën Presidentin, pazari i peshkut.
Meqë janë futur te Shekspiri, ai ka edhe një vepër tjetër që quhet “Tregtari i Venedikut”. Tregtarit të Venedikut i them ta marrë me qetësi e dashuri që shpk-ja e tij do marrë fund më 25 qershor. Pazaret politike marrin fund më 25 qershor. Merre me qetësi dhe dashuri.
