Kreu i Partisë Demokratike, Lulzim Basha komentoi shtyrjen e Këshillit të Mandateve për ditën e nesërme, duke theksuar se Rama bleu edhe disa orë më shumë për Saimir Tahirin në mënyrë që të prishen të gjitha provat.
“Sot Edi Rama urdhëroi mbrojtjen e Samir Tahirit. Përgjimet tregojnë qartë se Tahiri merrte shuma të mëdha parash nga lehtësitë që krijonte ndaj bandave të Habiljave. Drejtësia italiane po i menaxhon këto prova, po ashtu edhe nga këshilli i mandateve, parlamenti dhe prokuroria. Nuk ka drejtësi me Edi Ramën sepse ai ka bërë marrëveshjen me mafian. Askush nuk po kërkon prova për t’i hequr një privilegj, por provat administrohen nga gjykata. Faktet e bëra publike para shqiptarëve tregojnë qartë se parlamenti nuk ka rrugë tjetër veçse ti heqë Tahirit imunitetin dhe ta vendosë para drejtësisë. Tahirit iu blenë edhe 24 orë më shumë për të prishur provat, ashtu si vetë Rama dhe ministrat që rezultojnë në përgjimet e antimafies italiane. Me blerjen e këtyre orëve Rama vendosi se narkoshteti nuk mund të bëjë shtet”, u shpreh Basha.
Sipas Bashës, sot shteti ka rënë dhe ka ardhur koha që qytetarët të marrin në dorë fatet e tyre për larguar sa më parë qeverinë e kapur nga krimi.
“Ndaj për çdo shqiptar që pyet dhe kërkon veprim nga opozita, ne e ka marrë vendimin për të larguar qeverinë e mafias. Institucionet po rrënohen nga mafia. Ndaj i bëj thirrje çdo qytetari që deri më sot ka qenë në dyshim sa i përket mundësive dhe aftësisë për të bërë drejtësi nga Edi Rama, se po vjen ora për të marrë në dorë fatet tona dhe të gjithë së bashku. Të bëhemi bashkë për të larguar nga qeveria dhe për t’i hapur rrugën drejtësisë, që të gjykojë kupolën drejtuese të narkoshtetit nisur që nga Edi Rama, Fatmir Xhafaj dhe Saimir Tahiri”, përfundoi Basha.
