Kryetari i Partisë Demokratike, Lulzim Basha, në një deklaratë për mediat referuar raportit të OSBE-ODIHR-it, tha se raporti konfirmoi se votimet ishin antikushtetuese. Kryedemokrati ripërsëriti edhe një herë tjetër se në 30 qershor nuk kishte asnjë garë, asnjë konkurrencë dhe se 30 qershori ishte një grusht institucional realizuar në bashkëpunim me krimin e organizuar. Sipas tij, raporti rrëzoi gjithë shtetin e Ramës.
“Raporti i OSBE/ODIHR e ka rrëzuar farsën e 30 qershorit në çdo aspekt. Raporti tregon se 30 qershori ishte procesi më problematik dhe më i pandershëm i dy dekadave të fundit.
Për herë të parë në historinë e pluralizmit politik, kemi një raport i cili nuk flet thjesht për parregullsi teknike, apo shkelje, por për krime të mirëfillta dhe veprime të qëllimshme antiligjore të të gjithë stukturës elektorale në vend. Dhe për një shkatërrim të qëllimshëm të së drejtës së popullit për të zgjedhur.
Praktikisht ky është një dokument, i cili më shumë se raport zgjedhor ngjan me një raport për një ngjarje kriminale. Ky është raport që realisht përmban prova dhe fakte për të filluar hetime kriminale ndaj një sërë personash dhe institucionesh”, tha Basha.
