Kryetari i partisë Demokratike, Lulzim Basha, menjëherë pas përfundimit të takimit me ambasadorin amerikan, Donald Lu, i është drejtuar kryeministrit Rama, me një letër të hapur, ku i kërkon të pranojë pa kushte propozimin e fundit të SHBA-ve për zgjidhjen e krizës politike në vend
Më poshtë letra e plotë e Bashës drejtuar Ramës
“Z. Rama
Në emër të opozitës ju informoj se që prej ditës së djeshme në ora 12:00, opozita ka pranuar pa kushte propozimin e integruar të prezantuar si zgjidhje për krizën politike nga zv/ Ndihmës Sekretari i Shtetit Hoyt Yee.
Duke konfirmuar pranimin e plotë të propozimit të integruar, ju bëjmë thirrrje që edhe ju të konfirmoni publikisht pranimin pa kushte të propozimit të SHBA-ve për t’i hapur rrugë zbatimit të kësaj pakete, me qëllim garantimin e kushteve për një proces zgjedhor të lirë dhe të ndershëm për qytetarët shqiptar.
Duke shprehur bindjen se, propozimi i SHBA-ve përbën rrugën e duhur për zgjidhjen e krizës, konfirmoj gatishmërinë e opozitës për implementimin e plotë të saj, pas ansjë vonesë”.
