Kryetari i Partisë Demokratike, Lulzim Basha i cilëson qesharake veprimet e kryeministrit Edi Rama, i cili merret me të në vend që të merrte përsipër përgjegjësitë për dështimet e tij e të jepte dorëheqjen.
Sipas Bashës, 8 vite më parë, shqiptarët në vend të një kryeministri, morën një aktor estrade që e la Shqipërinë vendnumëro.
Basha shprehet se estrada e Ramës po ju shqiptarëve shumë shtrenjtë, ndaj dhe ka ardhur koha që vendi të ketë një kryeministër të vërtetë.
Postimi i Bashës në rrjetin social, Facebook
Është qesharake se si njeriu që e ka lënë Shqipërinë prej 8 vitesh vendnumëro e nuk ka bërë as edhe një hap para, i lejon vetes të merret me mua, në vend që të marrë përsipër përgjegjësitë për dështimet e tij e të japë dorëheqjen.
Unë nuk kam ndërmend të bëhem pjesë e kësaj loje. Kjo është sjellja tipike e humbësit që akuzon këdo dhe nuk pranon asnjë përgjegjësi për vete. Shqiptarët janë ngopur me të dhe llojin e tij.
Para 8 vitesh shqiptarët në vend të një kryeministri, morën një aktor estrade që e la Shqipërinë vendnumëro. Estrada e Ramës po ju kushton shqiptarëve shumë shtrenjtë. Ka ardhur koha që Shqipëria të ketë një kryeministër të vërtetë. Më 25 prill Rama humb dhe Shqipëria fiton.
