Kreu i Partisë Demokratike, Lulzim Basha po zhvillon mitingun përmbyllës në Gjirokastër. Kryedemokrati tha se të dielën do të ndryshojë gjithçka, ndërsa shtoi se ndryshimi mes tij dhe Ramës është se ky i fundit nuk i mban premtimet dhe se qëllimi i tij është vetëm timoni.
Ndër të tjera, Basha tha:
Të rinjtë dhe të rejat e Gjirokastrës do të kenë mundësi të jetojnë e punojnë në këtë qytet që është krenaria e jugut dhe e kombit tonë. Kam takuar mijëra qytetarë, njerëzit presin me padurim ditën e dielë për të votuar Partinë Demokratike.
Njerëzve ju ka ardhur në maje të hundës kjo gjendje e papërballueshme. Nga Gjermania në SHBA ka vetëm një plan ekonomik që zgjidh hallet e shqiptarëve. Është zgjidhja e planit tim ekonomik, reforma në drejtësi po ngordh, por e diela e ardhshme do vendosë për një ekonomi të fortë, me taksa të ulëta, me mbështetje për sipërmarrjen. Do të marrë fund djegia dhe persekutimi i shqiptarëve.
Rama s’do i mbajë premtimet, qëllimi i tij është vetëm timoni. Ndryshimi mes meje dhe atij është që unë i mbaj premtimet.
