Në seancën e sotme plenare, kreu i PD-së Basha ka sjellë në vëmendje faktin që salla e Kuvendit është e boshatisur nga ligjvënësit e mazhorancës dhe ministrat. Ai ka hedhur akuza kundrejt kryeministrit Edi Rama, se udhëton me charter privat. Basha tha se Rama dy ditë me parë ka shkruar drejt kryeqyteteve luksoze të botës me charter privat, ku vetëm karburant ka shpenzuar 120 mijë euro minimumi.
“Ku është kryeministri? Para dy ditësh shkoi e erdhi me charter privat diku, dhe nuk pati deçencën t’u thoshte shqiptarëve për çfarë po i harxhon paratë për udhëtim me charter luksoz. Vetëm karburanti shkon 120 mijë euro minimumi. Kur vjen puna për t’u përballur me përfaqësuesit e shqiptarëve, s’e dimë ku është”, tha Basha.
“Aleanca është e qartë që mbani me njëri-tjetrin. Nuk ka dyshim për shqiptarët se përse janë në këtë gjendje. Natyra e vërtetë kësaj qeverie shpaloset me aferën skandaloze. Jo vetëm për inceneratorët për çdo shkelje ju e bëni veshin e shurdhët.
Sot fermerët shqiptarë janë pa mbështetje. Miliarda euro këto tetë vite borxh, më shumë borxh nga të gjitha qeveritë e marra së bashku. Projektet e korrupsionit nuk u ndalët as në kohë pandemie. Dua t’ju pyes kur do të vijë dita ta ngrini zërin. Nuk resht së kërkuari që ato qe e kanë bllokuar hetimin për inceneratorët dhe zvarrisin hetimin për masakrën zgjedhore do të maten me hetimin dhe vënien para përgjegjësisë penale të kokës së korrupsionit në Shqipëri që është koka e masakrës së 25 prillit dhe koka e korrupsionit”, tha ai.
