Kreu i Partisë Demokratike, Lulzim Basha ka ftuar sërish sot qytetarët nga kryeqyteti që të marrin pjesë në protestën e nesërme.
Duke folur me qytetarë, Basha tha se ata do e vendosin Edi Ramën para drejtësisë ose në azil politik si ish-kryeministri maqedonas, Gruevski.
“Rama shpërfilli kërkesat tuaja. Dita e nesërme është dita e studentëve dhe dita e rinisë. Qytetarët do marrin nesër fatin e tyre në dorë. Nesër do jetë protesta më e madhe ne 3 dekada. Nesër është dita që Edi Rama do të mbajë përgjegjësi. Ia ka mbathur për në Vlorë, por edhe Vlora do ta përzërë. Sot Edi Rama duhet të fshihet sepse ka frikë nga studentët e shkolluar. Nesër shqiptarët do ta vendosin Ramën para drejtësisë ose në azil politik t’i bashkohet Gruevskit,”– tha Basha.
Po ashtu, teksa kishte përballë një student, Basha u bëri thirrje të gjithë studentëve që të marrin pjesë në protestë për një kauzë të përbashkët.
“U bëj thirrje të gjithë studentëve që nesër të jenë në protestë për një kauzë të përbashkët. Që ato pika që ne kemi kërkuar, të plotësohen sepse e ardhmja jemi ne, studentët e dytë të dhjetorit”, tha Basha.
