Partia Demokratike do të protestojë ditën e sotme bashkë me aleatët e saj në orën 11:00 përballë Kryeministrisë. Opozita do të kërkojë dorëheqjen e ministrit të Brendshëm Fatmir Xhafaj, pasi ky i fundit akuzohet si mburojë e vëllait të tij në trafikun e drogës në qytetin e Vlorës.
Për këtë arsye, Lulzim Basha së bashku me drejtuesit e partive të tjera aleate me PD-në, midis tyre edhe vetë LSI. Nga kjo e fundit mësohet se kryetarja e saj Monika Kryemadhi do të mbajë fjalimin e rastit në këtë protestë, e cila përflitet se mund të shndërrohet në një revoltë të dhunshme.
Megjithatë, ky është vetëm një hamendësim pasi protestat e shumta të Lulzim Bashës kanë qenë kryesisht paqësore. Por nga ana tjetër, kryeministri Rama duket se i është trembur kësaj proteste. Ai po zhvillon gati një anti-miting në qytetin e Beratit duke vijuar turin e dëgjesave të bashkëqeverisjes.
Pavarësisht kësaj PD ka vendosur të protestojë sot. Në Sheshin Skënderbej është shfaqur statuja e Drejtësisë me portretin e Edi Ramës, që simbolizon kapjen politike të drejtësisë për t’i shërbyer krimit dhe korrupsionit.
Statujën e Drejtësisë 3 metra të lartë e mbajnë 10 të rinj të maskuar si Edi Rama, Fatmir Xhafaj, Saimir Tahiri, Agron Xhafaj, Moisiu Habilaj për të treguar se Drejtësia është vënë në shërbim të trafikut të drogës, krimit të organizuar dhe qeverisë së lidhur me të.
Një simbol tjetër i shpërfytyrimit të Drejtësisë nga pushteti është portreti i Ramës që ka zëvendësuar sytë e mbyllur të Drejtësisë së barabartë për të gjithë me syrin që ai i shkel krimit për ta favorizuar dhe mbrojtur atë.
Peshorja e drejtësisë, që duhet të ishte e barabartë, peshon nga mbrojtja e Saimir Tahirit, Fatmir Xhafajt dhe parave të tyre të drogës, ndërsa Kushtetuta, që mbron të drejtat e qytetarëve të zakonshëm, është zhvlerësuar nga drejtësia politike e Edi Ramës.
Numrat e protestuesve
LSI njofton për numrin e protestuesve te nisur nga rrethet, konkretisht: Qarku Korçë 2000. Qarku Elbasan 3000. Qarku Berat 3000. Qarku Durrës 2500. Qarku Vlorë 1500. Qarku Gjirokastër 1500. Nga PD e Shkodrës janë nisur rreth 5000 protestues të organizuar. Nga Dibra, mësohet se janë nisur mbi 1500 protestues.
