Ndryshe nga herët e tjera në artikulimin publik, Basha e ka cilësuar kryetarin e PS-së, Edi Ramën, si kryeministri në ikje.
Basha vazhdon të këmbëngulë se PD-ja do e votojë vettingun, por me kushtin e qeverisë teknike.
“Sot kryeministri në ikje na propozoi të gjejmë një kompromis me shtyrjen e vettingut. Kjo është një tjetër dëshmi se për Edi Ramën drejtësia dhe reforma në drejtësi kanë qenë dhe mbeten vetëm një mjet pazaresh, shantazhi dhe imazhi. Kurse për ne, drejtësia është themeli që garanton lirinë dhe demokracinë, mbi të cilin do të ngrihet shteti modern shqiptar.
Ne jemi për vettingun, më 21 korrik votuam vettingun dhe do ta çojmë deri në fund vettingun. Ne kemi refuzuar vettingun e Edi Ramës sepse duam një vetting të vërtetë, të pa kapur nga politika dhe të paanshëm. Menjëherë pas formimit të qeverisë që do të garantojë zgjedhjet e lira dhe të ndershme, ne jemi të gatshëm të votojmë ligjin për zbatimin e vettingut sipas frymës dhe përcaktimeve kushtetuese të 22 korrikut.
Krimi qeveritar do të përballet me drejtësinë e pavarur, ata që e kthyen Shqipërinë në republikë të drogës dhe korrupsionit do të përballen me drejtësinë e vërtetë.
Mbi të gjitha, zgjedhjet e lira do të hapin rrugën për ndërtimin e shtetit të së drejtës dhe një demokracie perëndimore në Shqipëri. Liria, drejtësia dhe kontrolli mbi pushtetin do të jenë themeli i Republikës së Re”, shkruan Basha.
