Ndonëse na ndajnë dy muaj nga zhvillimi i zgjedhjeve vendore, kryetari i PD-së, Lulzim Basha ka dalë dje me një platformë mbi detyrat e qeverisë teknike, dhe profilin që duhet të kenë ministrat e rinj. Në aktivitetin e organizuar nga Partia Demokratike dhe opozita e bashkuar, ku u prezantua platforma për zgjedhjet e lira e të ndershme, ishin të pranishëm të gjithë krerët e partive të koalicionit opozitar.
Përveç kryedemokratit Basha, folës në këtë aktivitet ishin edhe kryetar të partive aleate, sikundër ishte kreu i PDIU, Shpëtimi Idrizi. Ra në sy mungesa e një fjalimi nga ana e kryetares së Lëvizjes Socialiste për Integrim, Monika Kryemadhi, duke dëshmuar qartë se mes PD dhe LSI ka një ‘krisje’.
Gjatë aktivitetit, kryedemokrati Basha nënvizoi se një nga pikat e platformës së opozitës është qeveria tranzitore.
