Kreu i Partisë Demokratike, Lulzim Basha ka akuzuar policinë e Shtetit se është kthyer në një bandë që i ka lënë dorë të lirë krimit.
Në një deklaratë për shtyp, Basha iu referua përplasjes së banorëve me policinë në Breg të Lumit dhe grabitjes në Rinas, duke akuzuar se shteti ka rënë.
Fjala e Bashës:
Dy ngjarje në një hark kohor prej më pak se 12 orësh ditën e djeshme, janë dëshmi se shteti ka rënë, se sot Shqipëria nuk ka rend dhe siguri. Se Policia është kthyer në një bandë që për pushtetin ilegjitim i ka lënë dorë të lirë krimit. Në 5:30 të mëngjesit policia hyri në banesat e banorëve dhe hodhi gaz, ku ishin të pranishëm edhe fëmijë. 3 qytetarë përfunduan në spital. 10 u shoqëruan në komisariat.
Kryhet grabitje me armë në mes të ditës, çdokush e kupton se në çfarë niveli është policia, në ç’nivel është katandisur rendi dhe siguria.
Jo vetëm nuk luftohet, por po nxitet pastrimi i parave me ndërtimet, inceneratorë dhe PPP. Shkaku kryesor i rënies së shtetit është pakti mes krimit dhe qeverisë ilegjitime të ardhur në pushtet me ndihmën e krimit.
Protestojmë të shtunën ë 13 prill në Tiranë, rruga e vetme për kthimin e shtetit si garantues të sigurisë e rendit është bashkimi i të gjithë shqiptarëve për sigurinë jetën dhe mirëqenien e të gjithë shqiptarëve.
