Kryetari I Partisë Demokratike Lulzim Basha, i ka dërguar një letër Guvernatorit të Bankës së Shqipërisë dhe të gjitha bankave që operojnë në vend, për të shprehur shqetësimin e tij dhe të partisë që drejton, lidhur me ato që ai i quan “përpjekje evidente të shumë aktorëve për të pastruar shuma të mëdha parash nëpërmjet aktiviteteve të licensuara apo të kontrolluara nga sektori publik.”
Zoti Basha thotë se vendi është përfshirë në kultivimin dhe tregtimin e lëndëve narkotike dhe është bërë rrugë tranziti për lëndët narkotike nga vendet e ndryshme drejt Europës Perëndimore. “Ky aktivitet i paligjshëm gjykohet që ka prodhuar miliarda Euro, një pjesë e të cilave janë përdorur edhe për të paguar qeveritarët dhe punonjës publikë, në formën e korrupsionit”, shkruan ai.
Kryetari i PD-së thotë gjithashtu se “shumë aktorë janë përfshirë në operacione të mbështetura nga të njëjtët punonjës publikë (përfshi nivelet më të larta të qeverisë), për të pastruar paratë e përfituara nga kultivimi dhe trafikimi i lëndëve narkotike apo/dhe korrupsioni” dhe se ata “po përdorin sektorin e ndërtimit si mjet për të financuar dhe pastruar paratë e fituara nga aktivitete të paligjshme.”
Zoti Basha shkruan se disa kompani kanë marrë leje ndërtimi dhe kontrata publike në nivele të tilla “që nuk justifikohen as nga eksperiencat e tyre dhe as nga mundësitë financiare që ato kanë”.
“Ky bashkëpunim dhe ajo çfarë parashtruam më sipër, ishte evidente edhe në vendimmarrjen në seancën plenare të Kuvendit të Shqipërisë, të datës 12 Shtator 2019, ku u miratua shpallja fituese pa garë dhe lidhja e kontratës së partneritetit publik privat për projektet “Për projektimin, ndërtimin, dhe mirëmbajtjen e segmentit rrugor Milot-Balldren”; “Për projektimin, ndërtimin dhe mirëmbajtjen e rrugës “Porti i jahteve – By-Pass Orikum – Dukat (ura e Shën Elizës)”, shkruan ai.
Zoti Basha thotë se të dy kontratat publike “cënojnë interesin publik dhe dëmtojnë në mënyrë të rëndë interesat financiare të shtetit shqiptar, duke u siguruar përfitime të padrejta zyrtarëve të korruptuar dhe kompanive private (shoqërisë “ANK” sh.p.k., shoqërisë “Bardh konstruksion” sh.p.k., shoqërisë “Gjikuria” sh.p.k. dhe shoqërisë “Rruga Orikum – Llogara” sh.p.k.).”
