Pas protestës së opozitës vetë kryetari i PD-së, Lulzim Basha ka shkruar rreth asaj se çfarë ka fituar sot opozita. Me anë të një statusi në “Facebook”, Basha shkruan se strategjia e opozitës është përballja, rezistenca, beteja totale sa kanë në dorë, në shpirt dhe në zemër.
Basha ka sqaruar se për të gjithë ata që nuk e kanë të qartë se çfarë do të arrijë opozita, ai është shprehur me një fjalë “fitore”. Për Bashën, opozita do të fitojë me çdo kusht e sado sfiduese dhe e mundimshme të jetë rruga drejt saj.
I pari i PD-së thekson se pa fitoren e kësaj kauze nuk ka të ardhme për fëmijët, për popullin shqiptar dhe për Shqipërinë. Ndërkohë më parë ishte anëtarja Këshillit Kombëtar të PD, Edith Harxhi, e cila po përmes rrjeteve sociale ka kritikuar Bashën, pasi sipas saj, populli ishte gati, por opozita nuk ka një lider që t’i udhëheq në rrugën për rrëzimin e qeverisë Rama.
Statusi i Bashës:
Sot, të bashkuar me gjithë shqiptarët e ndershëm në shesh, u ngritëm besimplotë për ta marrë fatin në duart tona. Strategjia jonë është përballja, është rezistenca, është beteja totale me gjithë sa kemi në dorë, në shpirt, në zemër dhe me gjithë fuqinë që na jep Zoti i madh KUNDËR kësaj të keqe që ka pushtuar vendin tonë, që ka marrë peng njerëzit dhe të ardhmen tonë, ka gllabëruar liritë dhe të drejtat tona! Kjo është strategjia.
Për ata që pyesin çfarë doni të arrini: Përgjigja është vetëm NJË FJALË: FITORE! FITORE! FITORE! — me çdo kusht dhe sado sfiduese dhe e mundimshme të jetë rruga drejt saj! Sepse pa fitoren e kësaj kauze, nuk ka të ardhme. Nuk ka të ardhme për fëmijët tanë, nuk ka të ardhme për popullin shqiptar, nuk ka të ardhme për Shqipërinë!”
