Kreu i Partisë Demokratike, Lulzim Basha ka thyer heshtjen në një intervistë dhënë për Al Jazeera. Basha tha se Shqipëria është e tronditur nga mosreagimi i ndërkombëtarëve ndaj përgjimeve të publikuara nga BILD, ndërsa më tej paralajmëroi se situata aktuale mund të çojë në trazira të shumta.
“Shqipëria është e tronditur nga mosreagimi i ndërkombëtarëve për provat që lidhin Ramën me krimin e organizuar përmes së cilëve ai rifitoi pushtetin në vitin 2017. Kjo është një situatë e rrezikshme, që çon në trazira civile, trazira sociale, nëse nuk ka një dënim të qartë të farsës e cila tashmë ka ndodhur”, shprehet Lulzim Basha për Al Jazeera.
Kronika e Al Jazeera është realizuar në qendrën e votimit në Shkollën e Mesme Ibrahim Rugova në Kamëz.
“E vetmja gjë që mund të më lëvizë nga zyra, është vota e njerëzve dhe jo vendimi i një partie politike. Ne nuk jemi në Korenë e Veriut dhe nuk jemi më në komunizëm. Unë nuk do të njoh këto zgjedhje”, shprehet kryebashkiaku i Kamzës, Xhelal Mziu për gazetarin e Al Jazeera.
