Gjykata e Tiranës ka pushuar padinë e bërë nga kreu i PD-së, Lulzim Basha, për aktivisten Evi Kokalari. Padia u bë nga Basha, për shkak të deklaratës së bërë nga Kokalari, e cila deklaroi se kryedemokrati ka dosje të hapura edhe në SHBA.
Çështja është pushuar, pasi as kryedemokrati Basha dhe as avokati i tij nuk u paraqitën në seancë. Evi Kokalari, në “Foltoren” e Sali Berishës tha se Lulzim Basha e ka “shitur” ish-kryeministrin për të mbyllur dosjen e tij që kishte në SHBA, sa i përket lobimit rus.
Kjo solli edhe reagimin e ashpër të PD-së, e cila përmes një deklarate njofton se do ta padisë penalisht për shpifje Kokalarin.
Çfarë tha Kokalari?
“Kam dëgjuar shumë që Lul Basha është marrë peng. Ne kemi biseduar lidhur me arsyet pse Berisha është larguar nga grupi parlamentar, është bërë fakt korrupsioni i tij.
Berisha është përjashtuar nga grupi, sepse është shkëmbyer me mbylljen e dosjes së korrupsionit të Lul Bashës. Prandaj është përjashtuar Berisha nga grupi.
Disa më kanë thënë që unë të bëhem kryetare e PD-së dhe shumë po thonë se prandaj i rri atij afër, por unë nuk kam nevojë që të bëhem kryetare e PD-së, sepse ajo e ka një kryetar tashmë dhe ai është Berisha.
Unë do të vazhdoj të ndihmoj qysh kur nisi çështja e Berishës. Ndërkohë Basha ka një dosje në Shqipëri dhe në SHBA. Basha nuk kishte pse i fshinte fondet e tij për të lobuar në SHBA për veten e tij”.
