Afati i vendosur mbi pranimin ose refuzimin e platformës “McAllister” ka alarmuar kreun e Partisë Demokratike, Lulzim Bashën e për rrjedhojë të gjithë opozitën.
Fillimisht Basha u takua në selinë blu me aleatët brenda dhe jashtë parlamentarë, me të cilët diskutoi platformën në fjalë.
Por, lëvizja e radhës tregoi shumë për kreun e PD-së: ai u nis menjëherë në zyrën e ish-kryeministrit Berisha për të diskutuar se çfarë do të vendosë Partia Demokratike.
Megjithatë, ky vijoi me të tjera: sërish një takim me aleatët në selinë blu dhe më pas me ish-liderin e PD-së, Sali Berishën.
Teksa burime nga PD-ja thonë se Basha ka vendosur pranimin e platformës “McAllister” , e cila do të zgjidhë krizën politike në vend, dita e sotme na la të kuptojmë diçka tjetër.
Takimet e njëpasnjëshme të Bashës me Berishën tregojnë qartë se kush është në të vërtetë lideri i Partisë Demokratike. Së fundmi, Basha është parë si një aktor i rëndësishëm në partinë e tij, por duket se as qëndrimi në “Çadrën e Lirisë” nuk e ka bërë atë një lider të mirëfilltë.
Lëvizjet e Bashës sot dëshmuan edhe njëherë rëndësinë e doktorit në Partinë Demokratike, edhe pse Berisha shpesh është munduar të mbajë distancë dhe ka preferuar të mos përfshihet në debatin e famshëm lidhur me kritikat e Bregut, Topallit dhe Selamit ndaj kreut të opozitës.
Teksa të gjithë presin përgjigjen zyrtare të kreut të PD-së dhe pranimin e platformës “McAllister” për zgjidhjen e krizës politike në vend, sot u vërtetua edhe një herë se Basha nuk bën dot pa udhëzimet e Berishës, duke lënë të kuptohet se kemi të bëjmë më shumë me një lider të komanduar sesa me një kryetar të pavarur në vendimmarrjet e tij politike.
