Kreu i Partisë Demokratike ka akuzuar sërish sot Ramën, një ditë pas protestave, se ka kapur kryeprokuroren e re Arta Marku, pas zgjedhjes së saj në shkelje të Kushtetutës.
Basha tha gjatë një deklarate për mediat se Gjykata Kushtetuese tashmë është nën presionin e Ramës, ndërsa shtoi se tymueset dhe sjellja e opozitës në parlament nuk janë antikushtetuese, raporton Tirana Today.
Basha akuzoi sërish Ramën se u ka dhënë tendera familjes Balilaj, si dhe ta se vendimi për një varg protestash në nisje të janarit sipas tij është vendimi i duhur për të reaguar ndaj shkeljes së Kushtetutës.
FJALA E BASHËS:
Qëllimi ka qenë kapja e prokurorit të përgjithshëm, me qëllim mbylljen sa më parë të dosjeve që implikojnë njerëzit e tij të afërt dhe vetë Edi Ramën.
Protesta e djeshme dhe ato që do të vazhdojnë janë shprehje e revoltës kundër Edi Ramës. Qytetarët kanë besuar të Reforma në Drejtësi. Edi Rama është i vendosur në rrugën e tij antireforma.
Parlamenti nuk është ai që patë dje në një shumicë të marrë peng nga krimi dhe lekët e drogës. Parlamenti nuk janë kartonët e marrë nga Taulant Balla siç e pa gjithë bota dje.
Ajo që është e rëndë, nuk është sjellja e opozitës në parlament, por sjella e Ramës ndaj Kushtetutës. Ka vetëm një dhunim, është shkelja e Kushtetutës nga Edi Rama.
Në çdo vend të botës, nëse do zbulohej që ministri i Brendshëm është koka e trafikut, qeveria do të ishte rrëzuar. Në Gjermani, Amerikë, nuk lejohet kjo. Në çdo vend evropian qeveria do të ishte rrëzuar.
Kushtetuta kishte caktuar prillin si afatin e fundit për Këshillin e Lartë të Prokurorisë, duhej të ishte zgjedhur 8 muaj më parë. E gjithë procedura e ndjekur nga Rama është e sajuar dhe e pashkruar në asnjë ligj, në asnjë rregullore.
Kushtetuta ndalon që Kryeprokuror të zgjidhet dikush që nuk e ka kaluar Vettingun, votimi është nul dhe i pavlefshëm sepse është kryer në shkelje flagrante të rregullores. Të gjitha këto fakte të çojnë se kryeprokurori sot është i Edi Ramës, arsyeja është mbrojtja e Ramës.
Balilajt kanë fituar tendera nga Edi Rama për mbrojtjen e objekteve shtetërore. Vendimi i opozitës për të nisur një varg protestash nga fillimi i janarit është vendimi i duhur, ftojmë të gjithë shqiptarët që nuk mund të pranojnë kurrë që Kushtetuta të shkelet. TIRANA TODAY
