Kryetari i Partisë Demokratike, Lulzim Basha ka publikuar në faqen e tij në Facebook, një foto ku shfaqet një gomone sipas të cilit i përket ish-ministrit të Brendshëm, Saimir Tahiri, i akuzuar së fundmi si i përfshirë në trafikun e drogës midis Shqipërisë dhe Italisë. Duke iu referuar mesazhit të një qytetari të dërguar në drejtim të adresës së kreut të PD-së, theksohet se mjeti i lundrimit është hequr sot nga porti, pa përcaktuar se në cilën zonë bëhet fjalë. “Pa koment: “Zoti Kryetar, kjo gomone që është hequr sot nga porti ka qenë e Tahirit”.”, thuhet në mesazhin dërguar Bashës.
Më herët, Basha deklaroi se kryeministri Edi Rama dhe ish-ministri i Brendshëm Saimir Tahiri gjenden në përgjimet e antimafias italiane, ku evidentohet marrja e shumave të mëdha nga aksesi që u është krijuar Habilajve sipas tij, në trafikun e drogës midis Shqipërisë dhe Italisë.
“Sot Edi Rama urdhëroi mbrojtjen e Samir Tahirit. Përgjimet tregojnë qartë se Tahiri merrte shuma të mëdha parash nga lehtësitë që krijonte ndaj bandave të Habiljave. Drejtësia italiane po i menaxhon këto prova, po ashtu edhe nga këshilli i mandateve, parlamenti dhe prokuroria. Nuk ka drejtësi me Edi Ramën sepse ai ka bërë marrëveshjen me mafian. Askush nuk po kërkon prova për t’i hequr një privilegj, por provat administrohen nga gjykata. Faktet e bëra publike para shqiptarëve tregojnë qartë se parlamenti nuk ka rrugë tjetër veçse ti heqë Tahirit imunitetin dhe ta vendosë para drejtësisë. Tahirit iu blenë edhe 24 orë më shumë për të prishur provat, ashtu si vetë Rama dhe ministrat që rezultojnë në përgjimet e antimafies italiane. Me blerjen e këtyre orëve Rama vendosi se narkoshteti nuk mund të bëjë shtet”, u shpreh Basha.
