Kryetari i PD, Lulzim Basha, ka përcjellë një reagim pas vendimit të gjykatës së Durrësit, që i dha mandatin e kryebashkiakes, kandidates socialiste Valbona Sako.
Kryedemokrati Basha, edhe një herë tjetër i ka mëshuar fort faktit se drejtësia në të gjithë Shqipërinë është sot në duart e krimit, dhe të organizatës kriminale të Rilindjes. Sipas tij, jemi kthyer në kohët e errëta, kur drejtësia ishte partia kriminale.
“Edi Rama përmes Vangjush Dakos dhe krimit të organizuar kontrollon pushtetin lokal, drejtësinë dhe çdo institucion tjetër të Durrësit. Bashkëpunëtori i bandës kriminale të Avdylajve, liruesi nga burgu i Lul Berishës dhe pastruesi i parave të krimit në Durrës, duhet të ishte në burg, por ai është padroni i atyre që që duhet ta dërgonin në burg.
Drejtësia në të gjithë Shqipërinë është sot në duart e krimit dhe të organizatës kriminale të rilindjes. Sot mes rilindasve dhe krimit nuk ka më asnjë ndryshim. Jemi kthyer në kohët e errëta, kur drejtësia ishte partia kriminale.
Me këtë drejtësi nuk do ketë kurrë politikanë në pranga, nuk do ketë kurrë kriminelë në burg. Me këtë drejtësi, prangat janë për njerëzit e thjeshtë dhe krimi e hajdutëria qeveritare bëjnë kërdinë. Çlirimi i vendit nga sundimi i Edi Ramës dhe bandës së tij në qeveri është domosdoshmëri për demokracinë, shtetin e së drejtës dhe stabilitetin e vendit”.
