Në datën 13 qershor, Partia Demokratike do të mbajë zgjedhjet për kryetarin e saj. Në PD ka nisur një debat i fortë sa i takon fatit të kryedemokratit Lulzim Basha. Dje u mblodhën Kryesia dhe Këshilli Kombëtar i PD-së, të cilët vendosën që PD-ja të shkojë në zgjedhje për kryetarin e ri. Në datën 13 qershor, kjo forcë do të mbajë zgjedhjet për kryetarin e saj.
Lidhur me këtë çështje të nxehtë, një reagim është përcjellë nga ana e ish-Ministrit të Drejtësisë, Ylli Manjani.
Ai ka shprehur qëndrimin e tij pas luftës së brendshme që po zhvillohet në Partinë Demokratike, për postin e kryetarit. Manjani shkruan me anë të një postimi në Facebook, se duhet të mësohemi me garën e konkurrencën, dhe të mos merremi me njëri-tjetrin, duke thënë se ‘ fajin e ka ai tjetri’.
Mandati i Lulzim Bashës mbaron më 22 korrik, por dje është vendosur që kjo datë të afrohet dhe zgjedhjet do të mbahen në 13 qershor. Ka qenë Sekretari i Përgjithshëm Gazment Bardhi, ai i cili ka propozuar këtë datë. Po kështu është vendosur që nga 16 deri më 22 maj të bëhet paraqitja e kërkesës për kandidim nga ata që përmbushin kriteret. Nga datat 24 maj deri më 11 qershor të jetë periudha e fushatës në të gjitha strukturat. Dhe në 13 qershor të bëhen zgjedhjet sipas parimit “Një anëtar, një votë”.
Statusi
“Rama ik”- se s’të mundim dot.
“Basha ik”- se as ty s’të mundim dot.
Ik ti të vij unë!
Ça quhet kjo?!
Garë?! Demokraci?!
Jo, or jo!
Duhet të mësohemi me garën e konkurrencën. Prandaj kanë rëndësi rregullat e ndershme e të drejta të garës. Me rregullat që të japin hakun dhe asgjë më shumë sesa të jep vota.
Në fakt, askush nuk merret me deformimin e rregullave, as me prezantimin e rregullave të reja të ndershme. Si brenda edhe jashtë partive njësoj. E njëjta sëmundje.
Të gjithë merren me njëri-tjetrin. As me veten jo…
Është më e thjeshta të thuash “fajin e ka ai tjetri”… Për fat të keq edhe më e besueshmja…
