Kryedemokrati Basha i ka dhënë dje një tjetër goditje të fortë ish-kryeministrit Sali Berisha, duke i rrëzuar këtij të fundit alibinë për çështjen e “Toyota Yaris”. Gjatë ditëve të fundit, Berisha po e përdor këtë çështje si armë kundër Bashës. Ky i fundit ka folur për mediat pasi dha deklarimet e tij në SPAK, në lidhje me dosjen “Toyota Yaris”. Kreu i PD-së dha dëshminë e tij për rreth dy orë, ku tha se është i gatshëm të ndihmojë drejtësinë belge. Ai iu përgjigj edhe Berishës, teksa tha se PD-ja është e vendosur të luftojë lidhjet e politikës me krimin. Basha ka shkuaur me urgjencë në Prokurorinë e Posaçme Kundër Krimit të Organizuar, ku është pyetur për dy orë rresht nga prokurorët belgë, ku ka dhënë përgjigje rreth pyetjeve të tyre në lidhje me dosjen e 3.4 milionë eurove të “Toyota Yaris”.
“Kanë konfirmuar edhe njëherë të vërtetën, dhe kanë hedhur poshtë gënjeshtrat. Çështja në Belgjikë nuk është mbyllur, siç ka ndodhur më çështja këtu, parate e konfiskuara nuk i janë kthyer, hetimi në Belgjikë vazhdon dhe drejtësia belge është e vendosur t’i shkojë deri në fund.
Në këtë kuadër, për herë të dytë do të bashkëpunoj me drejtësinë belge, me drejtësinë e çdo vendi partner në luftën kundër korrupsionit. E bëj këtë me vetëdijen se ky është mision që i përket të gjithë shqiptarëve. Është një proces që bëhet, por të tillë ka shumë.
Përmasat e bashkëpunimit të krimit me politikën në Shqipëri, janë në përmasa unike. Siguroj shqiptarët se unë dhe PD jemi në dispozicion të drejtësisë belge dhe drejtësisë në tërësi, dhe do jemi proaktivë në luftën tonë kundër krimit të organizuar, duan apo nuk duan të dyshuarit, të pandehurit, të korruptuarit “non grata”, të shpallur apo të pashpallurit.
Ju është thënë shqiptarëve që çështja është mbyllur, që janë ndarë paratë midis politikanëve të akuzuar dhe akuzuesve, të PD. Paratë janë konfiskuar dhe procesi vazhdon në Belgjikë.
Punonjësit e ndershëm të SPAK dhe BKH do kenë mbështetjen e PD-së, për të ecur përpara me hetimin e të gjitha çështjeve. Nuk janë vartësit e askujt, veç ligjit shqiptar dhe taksapaguesve shqiptarë”, tha Basha.
