Kryetari i grupit parlamentar të Partisë Socialiste, Taulant Balla ka kërkuar që Prokuroria në bashkëpunim me FBI-në dhe autoritetet britanike të hetojnë rastin e investigimit të revistës “Mother Jones”.
Sipas tij, lajmet e ripublikuar nga mediat prestigjioze në Amerikë dhe në Evropë tregojnë se ky është një skandal i madh. Balla sjell në vëmendje se kjo situatë nuk mund të kalojë më një fletë-rrufe të PD-së, por duhet një hetim i thelluar nga organet kompetente.
Përmes një statusi në rrjetin social “Facebook”, Balla shkruan se gazetarja e kësaj reviste përmes një komunikimi gjatë ditës së djeshme ka sqaruar të gjithë të vërtetën. Kjo sipas tij, hedhë poshtë pretendimet e PD-së se ky shkrim është paguar nga kryeministri Edi Rama.
Statusi i Ballës
Faktet e reja të nxjerra në dritë nga investigimi i Revistës amerikane “Mother Jones” dhe të ripublikuara sot në shumë media të tjera amerikane dhe në Europë, për financim të lobimit të Partisë Demokratike nga biznesmenë rusë, janë prova shqetësuese të një skandali të rëndë, i cili nuk mund të kalojë me një deklaratë “fletë-rrufe” të Partisë Demokratike, sot edhe dje.
Është e turpshme sjellja zyrtare e PD, e cila në vend që të sqarojë faktet për lidhje financiare me burime ruse, sulmon median amerikane.
Lidhur me përpëlitjen dhe akuzat qesharake të Partisë Demokratike, përgjigjia më e saktë dhe shteruese është reagimi i një prej gazetarëve të Revistës amerikane, zonjës Hannah Levintova, e cila sqaroi dje se:
“Artikulli është kryesisht i bazuar në dokumentat e plotësuara për Mbretërinë e Bashkuar dhe të formularëve zyrtarë të lobeve në Shtetet e Bashkuara për Departamentin e Drejtësisë dhe Kongresin.
Këto dokumente janë publikuar në shkrim. Akuzat se Mother Jones ka marrë para nga Edi Rama për ta publikuar këtë artikull janë absurde. Ne nuk pranojmë kurrë pagesa për një investigim, në çfarëdolloj forme qofshin ato dhe sigurisht që nuk e kemi bërë edhe në këtë rast.
Gjithashtu: Mother Jones është një uebsjat investigativ që ka fituar çmime për investigimet e tij dhe ka një sajt me 10 milionë lexues çdo muaj. Vitin e kaluar, ne fituam Çmimin Revista e Vitit dhe Çmimin Revista Kombëtare për raportimin më të mirë, nga Shoqata Amerikane e Botueseve të Revistave në Shtetet e Bashkuara.”
Prandaj Lulzim Basha dhe Partia Demokratike i detyrohen menjëherë shqiptarëve një sqarim të plotë të gjithë këtij skandali, të cilin e konsiderojmë tepër i rëndë.
Prokuroria duhet të zhvillojë një hetim gjithpërfshirës, në bashkëpunim me FBI-në dhe autoritetet britanike, për të zbardhur deri në fund përmasat e këtij skandali tepër të rëndë.
