Kryetari i opozitës, Lulzim Basha, ka folur sot për projektin e shkrirjes së Akademisë së Shkencave, dhe idesë së hedhur nga ministrja e Arsimit, Besha Shahini, për krijimin e një institucioni të përbashkët shkencor me vendet e rajonit. Basha e ka cilësuar si një akt të paprecedentë. Sipas tij, nëse ky vendim do të miratohet, demokratët me ardhjen në pushtet do ta anulojnë dhe do ta shpallin si kriminal.
“Ndërkohë që takohesha me të rinjtë, një tjetër akt i paprecedentë i kësaj qeverie po kryhej, shkrirja e Akademisë së Shkencave. Ai e ndërmerr këtë akt, sepse i ka tmerr zërat e pavarur. Ndaj dua t’u them këtë pasdite, atë që s’pata mundësi ta them në orët e para kur po ndodhte.
Hapi antikushtetues jo vetëm do të anulohet, por do të konsiderohet një akt kriminal. Po të kishim sot një kryeministër, ajo palo ministre do të shkarkohej.
Por kryeministër nuk kemi, ndaj ejani nesër t’i shkarkojmë të dy. Kjo ftesë u drejtohet intelektualëve, pedagogëve, por edhe sipërmarrësve shqiptare, biznesit prodhues. Sepse të gjitha shtresat, vetëm një fjalë kanë: “nuk durohet më”. Ndaj bashkohuni me uraganin, për një Shqipëri të ligjit dhe të qeverisjes evropiane”, ka thënë Basha.
