Publikimi i përgjimeve të reja të ‘Bild”, ka rindezur sërish debatin politik. Për këtë çështje ka reaguar dhe kreu i Bindjes Demokratike, Astrit Patozi, nëpërmjet një komenti në Facebook, ku tregon detajet se çfarë ndodhi në Kuvend menjëherë pas përfundimit të zgjedhjeve.
Me anë të pamjeve, ai kujton fjalën e tij mbajtur në vitin 2016, ku dhe në atë periudhë i mëshonte fort faktit se zgjedhjet në Dibër ishin blerë. Nga foltorja e Kuvendit, Patozi tha se edhe opozita ka përgjegjësinë e saj për këto humbje.
Ai zbulon se atë ditë kur fliste në Kuvend, me urdhër nga Basha, grupi parlamentar i PD-së braktisi seancën, ndërsa në sallë qëndroi vetëm Jozefina Topalli.
Statusi
ÇFARË NDODHI NË PARLAMENT DITËN E HUMBJES SË PD NË DIBËR?
Meqë sot temë kryesore e debatit politik janë përgjimet e publikuara nga BILD për zgjedhjet në Dibër, po publikoj fjalën time në parlament, menjëherë pas përfundimit të tyre.
Atë ditë, me një urdhër të çuditshëm dhe të pakuptueshëm të Lulzim Bashës, grupi parlamentar i PD braktisi seancën, ndërsa në sallë nga opozita qëndruam vetëm Jozefina Topalli dhe unë.
Ta kenë ditur që atëherë vallë, se do të vinte ky çast fatlum përgjimesh, që heshtën ditën kur duhet të shkundnin Kuvendin, por po flasin tani pas gati 3 vjetësh?
