Kryedemokrati Basha ka shprehur ankesën ndaj qeverisë, duke thënë se sistemi shëndetësor është në kolaps. Ai ka kërkuar që të testohen të gjithë personat që kanë pasur kontakt me të prekurit.
Me tone të larta, kreu i PD-së tha se qeveria është e papërgatitur për valën e dytë të pandemisë. Gjatë një bashkëbisedimi me gazetarët, Basha solli rastin e babait të një gazetari, të cilit nuk iu bë tamponi për 6 ditë radhazi, megjithëse ishte me simptoma.
“Kam marrë dhjetëra mesazhe të qytetarëve, me raste të ngjashme refuzimi me të ndjerin Çekiri. Përgjigjja e vetme e qeverisë është një paradë më shumë nga kryeministri, pa asnjë të dhënë sa mjekë, sa infermierë do punojnë në atë spital.
Jam personalisht në dijeni të rasteve me COVID të refuzuar nga sistemi shëndetësor. Nëse plani ynë do të ishte vënë në veprim, do të kishim funksionale kapacitete për të pritur të prekurit me covid dhe mundësi që të përballonim të tjerë.
Pacientëve u duhet të presin shumë ditë për të bërë tamponin. Babai i një kolegut tuaj ka pritur 6 ditë me simptoma për të bërë tamponin. Shumica dërrmuese e qytetarëve nuk mund ta përballojnë koston e paketës së trajtimit me paratë e tyre.
Qeveria, asnjë masë për të përballuar valën e dytë. Vala e dytë që sapo ka nisur, e gjen të papërgatitur këtë qeveri dhe Edi Ramën për ta përballuar.
Prej 4 javësh kërkoj të ndërmerren 4 hapa të thjeshtë: 1. Minimumi 2500 testime në ditë. 2. Mbulimi i kostove të paketës së trajtimit të COVID, të merret përsipër nga shteti.
3. Mobilizimi total i sistemit, për t’u përballur me çdo nivel të trajtimit të të sëmurëve.
4. Bonusi 1000 € për mjek, 500 € për çdo infermier”.
