Nga data 18 maj pritet që të hapen baret dhe restorantet. Këto biznese pritet që të ushtrojnë aktivitetin e tyre deri në orën 17:30, pasi konsiderohen me rrezikshmëri të lartë për përhapjen e COVID-19. Po kështu shërbimi do të jetë në ambientet e jashtme, sipas një protokolli të caktuar, që qytetarët që frekuentojnë këto ambiente të mos infektohen me koronavirus.
Baret dhe restorantet do t’u nënshtrohen rregullave strikte, higjiene dhe dezinfektimi të vazhdueshëm pasi të hapen më 18 maj. Për ato subjekte që do të vazhdojnë aktivitetin pas kësaj fashe orari, qeveria ka parashikuar masa të ashpra me gjobë deri në pezullim të aktivitetit.
Pyetja që parashtrojnë mësë shumti bizneset është se deri kur do të qëndrojnë me këtë fashë orari?!
Një lajm tejet optimist ka dhënë ministrja Denaj, e cila ka thënë se zgjatja e fashës së orarit do të vendoset në fund të muajit.
Ministrja e Financave dhe Ekonomisë, Anila Denaj, ka deklaruar në emisionin “Abc-ja e Mëngjesit” se shtyrja e orarit të hapjes së bareve dhe restoranteve pas orës 17:30, do të vendoset në fund të muajit. Kjo në varësi të qëndrueshmërisë së rasteve të reja me koronavirus.
“Ky 10-ditësh duhet të jetë në favor të biznesit për t’u bërë gati. Vendimmarje për orarin deri në 17:00 nuk do të jetë e vazhdueshme, por për të parë ecurinë dhe mund të ndryshojë brenda dy javësh në varësi të shifrave.
Nëse deri në fund të muajit edhe me hapjen e restoranteve nuk kemi rritje të shifrave, besoj se lehtësimi do jetë edhe më i zgjeruar. Biznesi nuk ka qenë si do jetë, dhe kjo nuk është vetëm në Shqipëri. Të gjithë ne po mendojmë si të qasemi në këtë situatë”, tha Denaj.
