Kapiteni Lionel Messi pak ditë më parë tha se katalanasit kanë probleme në mbrojtje dhe duhet të jenë më të fortë. Duket se drejtuesit e Barcelonës ia kanë dëgjuar fjalën dhe janë hedhur në sulm që tani për të siguruar përforcimin e radhës. Dëmtimi i Samuel Umtitit e ka bërë emergjente këtë operacion, saqë nuk do të shikohet se sa do të jetë kostoja.
Barcelona ka nisur zyrtarisht tratativën me Interin për sllovakun Milan Skriniar, i cili ishte në shënjestrën e tyre që në merkaton e verës, pasi preferohej shumë nga trajneri Valverde. Sipas medieve iberike, oferta “blaugrana” për futbollistin në fjalë ka shkuar deri në 84 milionë euro, shifër që ka lëkundur edhe më besnikët e klasit të Skriniarit në kampin zikaltër.
Të dy skuadrat do të përballen pas pak javësh në kuadër të Champions League dhe në ato ditë pritet të ketë zhvillime të reja dhe të konkretizohet më mirë situata. Barcelona nuk është duke menduar çmimin, pasi edhe pse Inter është në Champions këtë sezon, futbollisti do të kishte mundësi të aktivizohej me katalanasit në fazën me eliminim direkt.
Kjo, për shkak të rregullave të reja lehtësuese të UEFA-s mbi ndryshimin e ekipeve nga lojtarët brenda një kompeticioni dhe sezoni në vazhdim. Mbetet për t’u parë vullneti i Skriniarit për të lënë në mes kampionatin me Interin, edhe pse tundimi për të shkuar në një ekip si Barça ka nisur të japë efekt pozitiv në tratativa.
