Nuk ka fitues në “San Siro” në përballjen mes Milanit dhe Napolit. Një barazim që nuk i vlen asnjërit nga ekipet, ku Milani është në kërkim të një vendi në Champions League, ndërsa Napoli shpreson tek titulli kampion.
Milan mbetet shtatë pikë larg zonës Champions League, gjashtë javë para fundit, ndërsa Napoli mbetet tre pikë larg Juventus kryesues, që ka luajtur një ndeshje më pak, atë që do të zhvillojë kundër Sampdoria.
Ishte ndeshja e portierëve, ku Pepe Reina ka bllokuar disa herë sulmet e Milanit dhe fakti interesant është se në fund të sezonit do ti bashkohet ekipit kuqezi. Nga ana tjetër Donnarumma u bë lojtari më i ri në historinë e Serie A që arrin shifrën e 100 ndeshjeve. Gigi ishte ndër më të mirët në fushë dhe në fundin e takimit ka shpëtuar një gol të pastër, ku Milik ishte i vetëm përballë tij.
Vlen për t’u përmendur aktivizimi për 90 minuta i futbollistit të kombëtares tonë Elseid Hysaj me Napoli. Ai mori karton të verdhë kur u mbush një orë lojë. Milan, që nuk fiton prej katër ndeshjesh, javën e ardhshme do të luajë në fushën e Torino, ndërsa Napoli pret Udinese, por më parë duhet të bëj tifo për Sampdoria.
