U bënë ditë që banorët e fshatit Nivicë në Sarandë, kanë nisur protestat për hapjen e rrugës, e cila u krijon mundësi që të shkojnë në plazhin e Kakomesë. Banorët kanë ndërhyrë disa herë forcërisht, ku kanë shembur edhe portën e vendosur nga privati, ç’ka ju krijon mundësi atyre të shkojnë në plazhin publik që ndodhet pranë fshatit të tyre, por edhe në Kishën e cila gjendet brenda pjesës së rrethuar.
Për këtë çështje e cila nuk po merr drejtim, banorët janë takuar një ditë më parë edhe me kryetarin e Bashkisë së Himarës, por pa mundur të marrin një zgjidhje. Ata nuk e kanë lënë me kaq, por i kanë dërguar një mesazh edhe ministrit Damian Gjiknuri.
“Saranda Web” ka publikuar mesazhin që kryetari i fshatit Nivicë, i ka dërguar Gjiknurit, por edhe përgjigjen që ministri i ka kthyer atij. Kryetari i fshatit kërkon ndërhyrjen e ministrit për zgjidhjen e situatës, ndërsa përgjigjja e Damian Gjiknurit është se ‘kam bërë fjalë me atë Luanin, e s’po dëgjon’.
Sipas banorëve, Luani që përmend Gjiknuri në mesazh, është personi që ka vendosur rrethimin në zonën e Kakomesë. Siç duket, ministri është i pafuqishëm përballë ‘Luanit’ për të ndërhyrë, për hapjen e rrugës e cila është ndërtuar me fonde publike dhe që të çon në një plazh publik.
