Prej orëve të para të ditës, banorët e “Astirit” janë mbledhur bashkë në protestën e radhës. Këtë herë ata janë ndalur para Bashkisë së Tiranës. Në një zë ata kanë kërkuar bashkërisht takim me kryebashkiakun Erion Veliaj, për të marrë përgjigje lidhur me kërkesat e tyre, për kompensim me vlerën e tregut.
Banorët kanë paralajmëruar se nuk do lejojnë shembjen e shtëpive, pa marrë dëmshpërblimet, ndërkohë që punimet për zgjerimin e rrugës kanë nisur nga sheshi “Shqiponja”, duke hequr statujën, për t’i hapur rrugë ndërtimit të mbikalimit. Një prej protestuesve ka thënë se PS i ka dhënë votën, e ndërsa tashmë po i shkatërrojnë shtëpinë.
“I kemi dhënë votën PS-së. Tani po na shkatërron shtëpitë. Kryebashkiakut i bëjmë thirrje të vijë këtu. Protesta jonë është shumë paqësore, dhe e organizuar”, është shprehur një prej protestuesve.
“Ne nuk tërhiqemi. Për dy gjëra jeton njeriu; për nder dhe shtëpi. Shtëpitë tona nuk do të gremisen”.
https://tiranatoday.com/protestuesit-e-unazes-se-re-shpalosin-pankarten-para-bashkise-lali-eri-ku-je-fshehur/
