Banorët e lagjes “5 Maji”, prej ditësh po bëjnë rezistencë, dhe pavarësisht se kanë pasur edhe një takim me kryeministrin Edi Rama, ende nuk janë të bindur për një zgjidhje. Ata kanë depozituar në SPAK një kallëzim penal, pasi kundërshtojnë shembjen e banesave.
Banesat e këtyre banorëve preken nga projekti për rindërtimin pas tërmetit, si dhe rikualifikimit urban. Banorët kërkojnë garanci e kontrata për marrjen e shtëpive të reja, ashtu siç është deklaruar nga autoritetet.
Me anë të avokates Adriana Kalaja, banorët kërkuan që SPAK të bëjë sekuestron preventive dhe të ndalë aksionin për shembjen e banesave, deri në sqarimin e planit. Në një dalje për mediat, Kalaja tha se nuk ka një aktmarrëveshje mes banorëve, dhe se ajo që iu është dhënë atyre është diskriminuese.
“Sipas nesh, e gjitha nisi me VKM 78 të janarit të 2020, që ka në fokusin e saj rindërtimin. Aktmarrëveshja që i është drejtuar banorëve është diskriminuese, e pabazuar në ligj. Ajo nuk merr në konsideratë interesat e banorëve, dhe nuk ka afat se kur do të japë efektet.
Ligji e përcakton qartazi se duhet të ketë një vendim prishje. Vendim prishje që e kemi konsideruar shkelje flagrante. Kemi kallëzuar dhe kryetarin e kadastrës, pasi ka kthyer përgjigje negative në shpërdorim të detyrës, se banorët nuk mund të legalizohen. Të gjithë komponentët që kemi parashtruar para SPAK, besoj do të hetohen. Kemi kërkuar marrjen e masës së sekuestros preventive mbi projektin. Projekti është i Boerit, që nuk ka lidhje me projektin e rindërtimit për shkak të pasojave të tërmetit. Ne i Kemi kërkuar SPAK, vënien e sekuestros preventive mbi këtë projekt, dhe pezullimin e aksionit të prishjes deri në zbardhjen e çështjes”, tha Kalaja.
Dje, banorët e “5 Majit”, Paskuqanit e Laprakës u ngritës sërish në protestë. Para nisjes së seancës plenare, u bënë pritë deputetëve, duke u kërkuar të dëgjojnë zërin e tyre. Pak minuta më vonë, kryeministri Edi Rama ftoi tre përfaqësues të tyre në zyrë, brenda ambienteve të Kuvendit. Pas takimit, Rama tha se do të marrin shtëpi, si banorët që kanë certifikatë pronësie si dhe ato të cilët e kanë shtëpinë pa leje. Por banorët nuk mbetën të pakënaqur nga takimi me Ramën, teksa thanë se nuk kanë marrë asnjë garanci.
