Kryeminisri Rama ka apeluar ndaj bankave, që të pranojnë digjitalizimin. Ai ka kërkuar me ngulm nga bankat e nivelit të dytë të cilat operojnë në vendin tonë, të bashkohen me revolucionin digjital për shërbimet që japin ndaj klientëve. Kreu i qeverisë i kërkoi drejtuesve të bankave tregtare në vend, që të marrin masat për të lehtësuar procedurat për qytetarët, duke shmangur po ashtu edhe kostot e shërbimeve në sportele.
“Tani shumë shpejt ne do hyjmë, nuk do ketë më bileta letër. E gjitha do bëhet online për biletat ndërqytetëse, sikundër dhe për biletat qytetëse. Tani si mundet që për këto bileta me vlera të ulëta, të paguhet komision sa gjysma e vlerës së biletës? Kjo do të thotë jo lehtësim shërbimi, por rritje çmimi.
Ndërkohë qeveria në kushtet aktuale, subvencionon mbi 5 milionë euro që çmimi i biletës mos rritet për ata që marrin autobusin, qoftë brenda qoftë jashtë qytetit si rezultat i rritje së çmimit të naftës.
Si t’i themi që do e merrni online shërbimin, e do paguani komision? Çfarë është kjo? Janë bërë diskutime teknike pafundësisht, e s’kanë dalë në rezultat se nuk është çështje teknike por vullneti inercie e rehatie.
Unë e di që bankat për fitimin nuk njohin nënë e babë, se për këtë punë janë krijuar, që mos njohin nënë e babe. Por jo deri këtu tani. Kam parë raportet e diskutimeve të bëra mes nesh e jush e kundërshtime e kontestime pa lidhje fare për të përmirësuar teknologjinë tuaj.
Bankat e nivelit të dytë, kanë kosto 5 deri në 20%. Për çdo pagesë të kryer në sportel apo e banking. Dhe është e pamundur për ne të përballojmë këtë fluks në rritje të ankesave të qytetarëve, që thonë çfarë vlere ka që marrim shërbimet me shpejtësi nga e Albania e të harxhojmë tre orë në radhë në bankë për të paguar pesë mijë lekësha?
Plus nuk mjafton vetëm kjo. Çdo pagesë që bën qytetari apo biznesi për një shërbim online që e merr nga qeveria menjëherë, banka e konsideron ditën e nesërme.
Pra ti mund ta kesh afatin sot për të bërë një aplikim në shtet, e bën te E- Albania, e të djeg pagesa e bankës.
Se institucionit i duhet një ditë, e ky rasti më i mirë se ka ankesa sidomos për agjencinë shtetërore të Kadastrës, ku konfirmimi nga banka vjen me disa ditë vonesë.
Ç’a është kjo tani? Në cilën kohë jetojmë? Shekulli 21, nëse për pjesën e interesit tuaj ju jeni në shek 21, e nëse sistemi bankar i Shqipërisë ka qenë një nga pionerët e zhvillimeve e transformimit, në këtë aspekt ju jeni si fermerët njësoj. Por me ndryshimin që ju jeni banka e fermerët janë punëtorët e tokës.
Nuk ndodh që ne të pranojmë të rritet çmimi i biletës së qytetarëve për shkakun tuaj. Ju duhet të bashkoheni me revolucionin digjital e të bëheni shembull i përfitimeve nga ky revolucion”, tha Rama.
