Xherxh (Gjergj) Laçi, 52-vjeç u arrestua një ditë më parë nga blutë e Tiranës, pasi prej 6 vitesh mbante të ngujuar dhe dhunonte sistematikisht gruan dhe fëmijët e mitur për shkak të bindjeve radikale. Blutë e kryeqytetit bëjnë me dije se 52-vjeçari ka qenë i dënuar më parë për “armëmbajtje pa leje”.
Gjatë marrjes në pyetje, Laçi ka mohuar të ketë dhunuar bashkëshorten e tij Elena, si dhe dy djemtë A.S dhe S.L, përkatësisht 15 dhe 17 vjeç.
52-vjeçari Laçi ka dëshmuar para oficerëve të policisë dhe të Antiterrorit se nuk i linte fëmijët të dilnin nga banesa, për të mos u infektuar, raporton “Abc”.
“Kam ndjekur parimet e mia fetare. Fëmijët dhe bashkëshorten nuk i kam lënë të dalin për t’i ruajtur nga e keqja. Nuk doja që ata të nisnin drogën apo të infektoheshin”, ka pohuar Laçi.
Por krahas dëshmisë së tij, dy djemtë dhe nëna e tyre kanë treguar në prani të psikologëve se ata dhunoheshin sistematikisht. Ata janë dërguar në një qendër rehabilitimi.
Xherxh Laçi, pritet të dalë të martën në Gjykatën e Tiranës për t’u njohur me masën e sigurisë.
