Sot përpara autoriteteve të drejtësisë italiane do të dalë për herë të parë në gjyq grupi “Habilaj”. Ndërsa në ditë më parë prokurorë të Krimeve të Rënda në Tiranë zbarkuan në Itali ku morën në pyetje tre të arrestuar mes tyre dhe Moisi Habilaj, i përfolur për lidhje farefisnore me politikanin Saimir Tahiri. Habilaj akuzohet për përfshirje në trafik ndërkombëtar droge dhe armësh. Meridionews shkruan ndër të tjera se kjo çështje ka bërë që të ngrihen akuza për përfaqësuesin socialist.
Dje prokurorët Besim Hajdarmataj dhe Vladimir Marra ishte dysha që dje në mbrëmje përfunduan marrjen në pyetje të tre shqiptarëve, të cilët shkuan në një burg në periferi të Katanias ku qëndrojnë prej disa muajsh, Moisi Habilaj dhe Meridian Sulaj, ndërkohë që Nazer Seitaj ndodhet në një burg tjetër në Romë.
Udhëtimi i tyre ka pasur si objektiv kryesor marrjen e informacioneve të vlefshme për hetimet që shohin në bankën e të akuzuarve në Shqipëri, ish-ministrin e Brendshëm, Saimir Tahiri. Ndërsa pak ditë më parë, ai u lirua nga arresti shtëpiak për t’u gjykuar në gjendje të lirë, pas arrestimit të kushëririt të tij, Moisi Habilaj.
Ky i fundit konsiderohet nga Prokuroria e Katanias dhe hetuesit e Guardia di Finanza si mendja e një trafiku të madh ndërkombëtar droge dhe armësh nga Shqipëria në Itali. Një trafik që nxirrte me miliona euro fitime dhe ulte në të njëjtën tryezë shqiptarët dhe anëtarë të Cosa Nostra-s italiane.
Hetimet e autoriteteve italiane, të përfunduara zyrtarisht në Dhjetor të një viti më parë, do të nxjerrin në gjyq 15 persona, ndërsa seanca e parë do të mbahet sot 31 Maj. Në disa përgjime të zbardhura ekskluzivisht nga Meridionews, trafikantët përmendnin dhe emrin e ish-ministrit Tahiri.
Një lidhje të cilës i shtohet dhe një automjet i përdorur nga banda për lëvizjet dhe që ishte në emër të Tahirit. Por ky i fundit këmbëngul se automjetin ia ka shitur në të zezë kushëririt të tij Habilaj. Prokurorët shqiptarë morën dje në pyetje Maridian Sulaj e Nazer Seiti.
Ky i fundit u ekstradua në Itali mes shumë polemikash pasi u arrestua nga policia shqiptare në Vlorë. 41-vjeçari ishte objektiv akuzash dhe polemikash pasi në Shqipëri ishte publikuar lajmi, që më pas u përgënjeshtrua, se po bashkëpunonte me hetuesit e Prokurorisë së Katanias.
Më tej, Meridionews bën dhe një përmbledhje të impaktit që çështja Tahiri ka aktualisht në skenën politike shqiptare, duke shkruar se kriza qeveritare në Shqipëri pas hetimeve të “Rosa dei Venti” vijon ende. Hetimet për Tahirin u paraprinë nga kërkesa për arrestimin e tij, që nuk u pranua nga asambleja parlamentare.
48 orë pas arrestimit të kushëririt Moisi Habilaj, ndërkohë që vëllai i tij Floriani është ende në arrati, politikani socialist tregoi një dokument me vulën e Prokurorisë së Katanias, sipas të cilit, ai përjashtohej nga këto hetime nga pala italiane.
Por Meridionews thekson se dokumenti në fjalë kishte shumë pika të deformuara dhe të ndryshme në krahasim me dokumentet tradicionale që përdorin hetuesit italianë. Për momentin Tahiri është i lirë nga arresti shtëpiak dhe po hetohet në gjendje të lirë.
