Mario Balotelli ka zhvilluar një ndeshje të mirë përballë Marseille, ku ka shënuar një gol mjaft të bukur por që rrezikon të jetë edhe ndeshja e fundit për të në Francë. Ai në fundin e takimit ka shpërthyer në ofendime ndaj arbitrit, pasi ndeshja Nice-Marseille përfundoi 2-1 në favor të miqve.
Kamerat televizive e kanë kapur momentin teksa sulmuesi italian thotë ‘Gjithmonë me mua e kanë këta m… arbitrash francezë, gjithmonë me mua’ duke u ankuar për gjyqtarin që e kishte ndëshkuar me karton të verdhë gjatë pjesës së parë. 27-vjeçari është ndëshkuar me karton të verdhë 13 herë këtë sezon dhe një herë me karton të kuq, një rekord modest ky krahasuar me vitet e shkuara.
Një deklaratë të tillë e ka bërë edhe ylli suedez, Zlatan Ibrahimovic, pas një humbjeje të Paris SG ndaj Bordeaux në vitin 2015. Ibra e ka quajtur Francën “vend m…”, por më pas kërkoi falje në atë rast, por gjithsesi u dënua me 4 ndeshje pezullim.
Nëse zbatohet i njëjti dënim, italiani nuk do të luajë më me Nice-n këtë sezon dhe ndoshta kurrë më, pasi mendohet se do të largohet në verë.
Para se të ‘shpërthente’ në ofendime, Balotelli kishte shënuar golin e tij personal të 23-të, duke i dhënë skuadrës epërsinë, por Marseille kishte arritur të kthente rezultatin.
